Pútín vill bara frið

Þrátt fyrir harða gagnrýni mína undanfarið, er ég nú sannfærður um að Pútín vill bara frið. Hvernig veit ég það? Jú, ég heyrði og sá hann segja það sjálfur og það náðist á myndband. Mér finnst hann bara svo sannfærandi að mér dettur ekki annað í hug en að trúa honum.

 

 

En ykkur?

Klappstýrur Pútíns, reynið að skilja að...

...hryðjuverkamaðurinn í Kreml er ekkert síður hættulegur eigin þjóð. Yfirskyn hans um að hann sé að uppræta nasisma, er fáránlegt og að það sé til fólk hér á blogginu sem trúir þeirri þvælu, jaðrar við að geta kallast heilaskemmdir. Pútín fer sjálfur að komast upp að hlið Hitlers á listanum yfir mestu stríðsglæpamenn mannkynssögunnar. Virðing hans fyrir mannslífum virðist ekki vera mikið meiri en hún var hjá einræðisherranum með tannburstaskeggið.

Gamli KGB-foringinn er líka blóðugur upp fyrir axlir af blóði rússneskra hermanna - oft kornungra - í tugþúsundatali samkvæmt fréttum, á aðeins tæplega tveimur mánuðum. Við þetta bætast síðan áhrifin af efnahagsþvingunum, sem bitna fyrst og fremst á almenningi. Ekki mun hrottinn selja gullklósettin í Kreml til að fólkið sem er svo ógæfusamt að sitja uppi með hann sem einræðisherra yfir sér, eigi fyrir mat.

Flóttamannabylgjan frá Úkraínu er þegar orðið stórt vandamál og harmleikur, þó Vesturlönd séu að gera sitt besta þrátt fyrir að standa frammi fyrir efnahagskreppu af völdum óþverrans í Kreml. Fjórði hver íbúi Úkraínu er á flótta innan- eða utanlands, ímyndið ykkur ef það kemur álíka bylgja frá Rússlandi með 145 milljón íbúa.

Brjálæðinginn í Kreml verður að stöðva, þó ég óttist að það verði ekki hægt fyrr en að hann er búinn að valda enn meira tjóni. Þangað til það gerist vona ég a.m.k. að það verði þaggað niður í klappstýrusveit hans á Íslandi.

 

Áhafnar Moskvu saknað

Bannað að taka með sér popp og sælgæti í bíó

Best að blogga um eitthvað annað en hryðjuverkaárás rússneska hersins í Úkraínu, ágætt að dreifa huganum að einhverju jákvæðu, eða a.m.k. ekki eins neikvæðu og voðaverk Pútíns og undirsáta hans við Svartahafið eru.

Nú hefur Filmstaden, stærsta bíókeðjan að ég held í Svíþjóð, bannað bíógestum að hafa með sér sælgæti, poppkorn og drykki, nema þessar vörur séu keyptar í sjoppunum sem bíóin reka.

Ég skil að bíóin eru ekki að halda úti sjoppu með tilheyrandi launakostnaði nema einhverjir kaupi vörurnar þar, en ég fór að reikna hvað þetta kemur til með að kosta foreldra með tvö börn sem vilja fara í bíó með alla fjölskylduna.

Reiknaði út að einungis aðgangsmiðarnir kosta um 500 sænskar krónur. Það er erfitt að neita krakkagreyjunum um smá sælgæti eða popp og kók og oft vilja foreldrarnir sjálfir fá eitthvað að japla á.

Fréttamaður SVT fór inn í söluturn rétt hjá einu bíóinu og sagði að einn poppkornspoki þar kosti 15 krónur. Algent verð á poppi í bíósjoppunum er þrefalt miðað við söluturnana eða litlar matvörubúðir í stíl við 10-11 búðirnar íslensku, að sögn fréttamannsins.

Þá erum við sjálfsagt ekki að tala um minna en 50 krónur fyrir popp og kók og meira ef keypt er bland í poka eða eitthvað slíkt. Við erum að tala um ekki minna en 200 krónur fyrir fjögurra manna fjölskyldu og svo bætist miðaverðið við allt saman.

Sem sagt bíóferð fyrir vísitölufjölskylduna kostar um 700 sænskar krónur, eða 9.500 íslenskar á núverandi gengi! Nú þekki ég ekki verðlagið á Íslandi, en er ekki orðið nokkuð dýrt að bjóða börnunum í bíó? A.m.k. í Svíþjóð og mig grunar að ekki sé það ódýrara á Íslandi.

Frétt um málið (á sænsku, auðvitað!)

https://www.svt.se/kultur/filmstaden-forbjuder-medhavt-godis-pa-bio

Fádæma hroki þýsku sendinefndarinnar hjá SÞ

Á fundi Sameinuðu þjóðanna í septembermánuði 2018, ávarpaði Donald Trump, þáverandi Bandaríkjaforseti allsherjar(ó)ráð Sameinuðu þjóðanna. Hann réðist harkalega á OPEC olíuríkin og sakaði þau um að arðræna allan heiminn með því að okra á olíunni sem þau flytja út og valda þannig fátækt og hörmungum, sem fífl allra landa kenna síðan Vesturlöndum um (mín orð, ekki hans.)

Hann lagði áherslu á mikilvægi hverrar þjóðar að vera sem mest sjálfri sér næg í orkumálum. Í ljósi þess beindi hann síðan orðum sínum að Þýskalandi og sagði, í lauslegri þýðingu minni:

 

Þýskaland mun verða algjörlega háð Rússlandi um orkuþarfir sínar, ef landið breytir ekki um stefnu á stundinni.

 

 

Hér má sjá myndbandið, en áminning hans til Þýskalands byrjar þegar u.þ.b. 21 og hálf mínúta er liðin af myndbandinu. Þó hvet ég alla til að horfa á myndbandið í heild sinni, því ræðan er stórgóð og á svo sannarlega erindi til okkar í dag, í ljósi hörmunganna í Úkraínu.

 

Þegar hann mælir þessi orð, má sjá fulltrúa þýsku sendinefndarinnar sýna fádæma hroka og hlægja að honum. Mikil er skömm þessara manna núna, í ljósi fjöldamorða rússneska hersins á varnarlausum borgurum í Úkraínu, oft gamalmennum, konum og börnum. Ef þeir eru ennþá hlæjandi er a.m.k. ljóst að þeir hafa mjög brenglað skopskyn.

 

Sendinefnd Þýskalands skemmtir sér vel undir skammarræðu Trumps í þeirra garð. Skemmta þeir sér eins vel núna, hjálparlausir í gas- og oliu-

hálstaki Pútíns, sem þeir komu sér í þrátt fyrir viðvaranir um að gera það ekki?

 

Hvers vegna er ég að rifja þennan tæplega þriggja ára atburð upp núna? Jú, vegna þess að Þýskaland breytti ekki um stefnu og hélt fast við áform sín um Nord Stream 2, neyðist Þýskaland og megnið af Evrópu til að horfa hjálparlaus upp á rússneska herinn stráfella almenna borgara.

Það er erfitt að rífa kjaft núna og húsbóndinn í Kreml hlær enn sem komið er að allri gagnrýni Vesturlanda á sig og stefnu sína. Ef gagnrýnin fer að fara í taugarnar á honum, mun hann bara skrúfa fyrir gasið og olíuna, frysta almenning í Evrópu í hel og a.m.k. hægja verulega á hjólum atvinnulífsins, sem snúast ekki sérlega hratt án jarðefnaeldsneytis.

Ég vona sannarlega að þessi fyrrum ráðgjafi Pútíns hafi rétt fyrir sér og ég rangt fyrir mér og skal með ánægju fara í tvær lopapeysur í staðinn fyrir að hækka á ofnunum, ef það stuðlar að því að koma einræðisherranum í Moskvu á hnén og helst fram fyrir stríðsglæpadómstólinn í Haag.

 

Viðskiptabann lausnin að sögn fyrrum ráðgjafa Pútín

Fjalla fjölmiðlar sem sagt ekkert um nýnasisma í Úkraínu?

Þá hlýt ég að vera að blogga við frétt sem er ekki til. Kannski er þessi bloggfærsla ekki til heldur? Geir Ágústsson, vinur minn, hvað segir þú um það?

Annars er þessi greining mbl.is prýðisgóð. Niðurstöðurnar sem ég les út úr henni, er að átylla Pútíns um afnasistavæðingu er auðvitað ekkert annað en yfirskyn til að uppfylla stórveldisdrauma brjálæðings.

Það þarf ekki annað en að lesa annað sem Pútín hefur skrifað, þar sem hann segir að Úkraína sé gerviríki og mistök fyrri leiðtoga kommúnistanna í Sovétríkjunum og að landið hafi alltaf tilheyrt Rússlandi (sem er rangt, ef út í það er farið.)

Einnig er bent á að það séu fasistahreyfingar starfandi í Rússlandi, með velþóknun Pútíns. Ég, ekki mbl.is, segi með velþóknun hans því Pútín hefur slík heljartök á  fjölmiðlum og félagastarfsemi, að það væri löngu búið að berja þessar hreyfingar niður væru þær í andstöðu við vilja einræðisherrans.

Pútín hafi einnig verið í góðum tengslum við þjóðernissinnaða stjórnmálamenn eins og Marine Le Pen og Matteo Salvini, þó það sé mín skoðun að það er engan veginn hægt að kalla hreyfingar þessara einstaklinga nýnasismasamtök. Loks er bent á að tilvist 1.500 manna hreyfingar sem bendluð er við nýnasisma, getur ekki talist vera réttlæting árásar á 40 milljón manna þjóð.

Að lokum vil ég benda á að stríðsglæpir Pútíns eru af þannig gráðu að við höfum ekki séð annað eins frá því í seinni heimsstyrjöldinni og samlíkingar á Pútín við Stalín og Hitler, eru handan við hornið. Þannig að hverjir eru nasistarnir í þessari deilu?

Pútín og nasisminn

Þarf ekki að senda Ólaf Ragnar Grímsson til Finnlands?

Til að taka Finnana í smá endurmenntun, eins og önnur fyrrverandi klappstýra útrásarvíkinganna hvatti til að gert yrði við þá sem vöruðu við hruninu af völdum þeirra?

Það verður að fræða þá finnsku um að félagafrelsi og að styrkja eigin varnir er auðvitað hvort tveggja stórhættulegt heimsfriðnum og mér sýnist fyrrverandi forsetinn okkar vera hæfasti maðurinn í hlutverkið.

Finnar munu sækja um aðild að NATO (frétt af RÚV)

Mannréttindarán SÞ ekkert nema nafnið - með eða án Rússlands

Mannréttindarán SÞ,oft ranglega nefnt Mannréttindaráð SÞ, er auðvitað ekkert annað en brandari, þó mjög sorglegur í ljósi óþverraverka rússneska hersins alveg frá því þeir ruddust á skítugum hermannastígvélunum inn í Úkraínu. Það þarf ekki annað en að skoða nöfnin á þeim löndum sem nefnd eru í viðtengdri frétt til að skilja það.

Kína, Kúba, Kasakst­an, Líb­ía, Kat­ar, Sómal­ía, Sam­einuðu ar­ab­ísku fursta­dæm­in, Úsbekist­an og Venesúela. Öll þessi lönd, þyrftu að hverfa úr ráðinu til að hægt væri að kalla það Mannréttindaráð SÞ á ný. Á þennan lista yfir síbrotamenn í mannréttindamálum má síðan bæta Sádi-Arabíu. Ef forráðamenn einhvers af þessum löndum yrðu spurðir hvað mannréttindi eru, myndu þeir þurfa að fletta upp í orðabók til að geta svarað spurningunni.

Ég á ekki að þurfa að nefna það að Rússlandi þarf að sparka úr öllum ráðum og nefndum sem hafa orðið mannréttindi einhvers staðar í nafninu. Þangað til þetta verður gert mun þetta (ó)ráð auðvitað ekki verðskulda neitt annað nafn en það sem ég gaf því í upphafi færslunnar - Mannréttindarán Sundruðu þjóðanna. Sumir segja að skammstöfunin SÞ standi fyrir Sameinuðu þjóðirnar, en ég held að það sé ekki rétt.

Rússum verði fleygt út úr mannréttindaráði SÞ