Velheppnaður baráttufundur Sólar í Straumi

Vel heppnaður baráttufundur samtakanna Sólar í Straumi var haldinn í íþróttahúsinu í Hafnarfirði í kvöld. Til stóð að hafa fundinn á Thórsplani, en vegna veðurs varð að færa hann í íþróttahúsið í Strandgötu.

Tónlistarfólk lék fyrir gesti fundarins, á milli þess sem nokkrir þjóðþekktir einstaklingar héldu ræður. Guðríður Lilja Grétarsdóttir, frambjóðandi Vinstri Grænna hélt fyrstu ræðuna. Hún vakti athygli á því að fjölþjóðafyrirtæki væri á góðri leið með að kljúfa þjóðina upp í andstæðar fylkingar, vegna fyrirhugaðrar stækkunar álversins í Straumsvík.

Næstur sté Jón Baldvin Hannibalsson í pontu. Hann hefur engu gleymt karlinn, þrátt fyrir langa fjarveru frá stjórnmálum. Hann benti á þá óþægilegu staðreynd, að ef áform ríkisstjórnarinnar um 6 álver ná fram að ganga, þá er búið að selja orkuauðlindir landsins til erlendra og innlendra auðkýfinga um aldur og ævi. Vill einhver lifa með það á samviskunni?

Þar að auki sagði Jón Baldvin efnislega, að ef meirihluti Hafnfirðinga segði nei við stækkun álversins í kosningunum 31. mars, væri það ekki einungis stórfrétt hér á landi, heldur um allan heim. Hafnarfjörður myndi komast í heimsfréttirnar, sem lítill bær á Íslandi, sem stóð upp í hárinu á risastóru fjölþjóðafyrirtæki, sem hefur gríðarlega völd og áhrif um allan heim vegna stærðar sinnar.

Þetta er því einstætt tækifæri, sem Hafnfirðingar mega ekki láta framhjá sér fara, að senda fjölþjóðafyrirtæki, sem er þekkt fyrir að virða að vettugi vilja fólksins í þeim löndum sem það hefur starfsemi, þau skilaboð að hér er fólk sem lætur ekki auðhring beygja sig og vill haga sínu lífi í sátt við náttúru lands síns. Það krefst hugrekkis, en gæti orðið mörgum til eftirbreytni.