Eineygður fólksbíll á Hellisheiði í blindhríð

Ég var að koma af Hellisheiðinni á austurleið nú fyrir stuttu síðan. Færð var farin að spillast og blindhríð á köflum, sérstaklega síðustu kílómetrana, áður en komið er að Kömbunum. Þegar ég var að koma niður af heiðinni mætti ég fólksbíl, sem var að leggja á heiðina. Hann var ljóslaus hægra megin (eineygður.)

Ég efa það stórlega að þessi bíll hafi komist langt. Ég var á jeppa, en í verstu þæfingunum var ég við það að keyra út af veginum.

Það er eitthvað sambandsleysi í ljósabúnaðinum á mínum bíl, sem veldur því að stundum kvikna ekki bæði aðalljósin þegar bíllin er ræstur. Sem betur fer blikkaði einn ökumaður mig með háu ljósunum í tíma og ég gat lagað ljósið.

Það verður ekki of oft brýnt fyrir ökumönnum að vera ekki að þvælast á illa búnum bílum, svo ekki sé minnst á eineygðum , í erfiðu færi og vondum veðrum á varasömum leiðum eins og Hellisheiði.

Allt of mikið er um slíkt og það mætti fækka stórlega útköllum björgunarsveita ef fólk hugaði betur að veðurspám og væri ekki úti að aka, í fleiri en einni merkingu, í vondum veðrum.