Enn um neytendavernd

Réttindi neytenda hafa mikið verið í umræðunni undanfarið og er það vel. Okursíða Dr. Gunna fékk neytendaverðlaunin eing og ég hef bent á í annarri færslu.

Neytendur eiga rétt á að verðmerkingar séu skýrar og ef misræmi sé á milli verðs einhverrar vöru í hillum og kassaverðs eigi hilluverðið að gilda. Síðan má ekki gleyma bannsettri fákeppninni og samráðinu sem talið er ein ástæða hæsta matvöruverðs í heiminum. Það er þó bót í máli að við hömpum heimsmeistaratitli í einhverju, fyrst okkur tekst það aldrei í handknattleik.

Ég vil benda á eitt annað sem neytendur eiga rétt á og ættu að athuga, að innslegið verð sjáist á skjá sem snýr að kaupandanum.

Ég fór í Europris nú um daginn og átti mjög skrýtið samtal við piltinn á kassanum:

 

Ég: Það er enginn skjár á þessum kassa, sem snýr að viðskiptavininum.

Afgreiðslupiltur (með hárið ofan í augunum, ég velti fyrir mér hvort hann sæi hvað hann stimplaði inn:) Nei, hann er bilaður.

Ég: Það er lögbrot að hafa ekki þannig skjá.

Afgreiðslupiltur: Verslunarstjórinn sagði að það yrði gert við hann, en svo hefur það ekki verið gert. Það er skjár á hinum kassanum.

Ég: Hvers vegna afgreiðirðu ekki á honum?

Afgreiðslupiltur: Verslunarstjórinn vill að hver starfsmaður sé á ákveðnum kassa.

 

Lengra var ekki samtalið, að öðru leyti en ég sagði að þessar afsakanir væru aumar.