Harmakvein kaupmanna

Mikið hefur verið rætt og ritað um þá ákvörðun bæjaryfirvalda á Akureyri að meina aldurshópnum 18-23 ára aðgang að tjaldsvæðum bæjarins á hátíðinni Einni með öllu. Hæsta ramakveinið kemur frá kaupmönnum, sem töldu sig hafa orðið af miklum tekjum. Í fjölmiðlum hefur komið fram að um helmingi færri voru á hátíðinni í ár en fyrri ár. 

Talsmaður bæjaryfirvalda rökstuddi ákvörðunina þannig að mestu vandræðin fylgi þessum aldurshóp. Hann virðist eitthvað hafa haft til síns þar sem að sögn lögreglu er mikill munur á umgengni í bænum nýliðna verslunarmannahelgi og fyrri ár. 

Má líta svo á að eina ástæðan fyrir því að kaupmenn vilji fá ungt fólk í bæinn er að þau eyða svo miklu? Skiljanleg ástæða fyrir verslunareigendur, en þeir virðast ekki miklar áhyggjur af því að hinn fallegi höfuðstaður Norðurlands sé undirlagður af drykkjuskap og slæmri umgengni heila helgi. Aðalatriðið virðist vera að fá nógu mikið í kassann. Þeir sem drekka frá sér ráð og rænu halda ekki eins fast um veskið.

 

Kaupmenn komust ekki í feitt,

kætast ei í þetta sinn.

Þykir þeim það afar leitt

að ekkert kom í kassann inn