Er ekki alveg að skilja þessa frétt

Ég er búinn að panta bíómyndir og tónlistardiska nokkrum sinnum á Amazon. Ég hef alltaf verið rukkaður um virðisaukaskatt. Þá er ég að tala um áþreifanlega DVD- og geisladiska, ekki til niðurhals.

Ef átt er við efni til niðurhals, þá er það vissulega nýtt ef verið er að sjá til að menn greiði virðisaukaskatt af þannig sölu, en þá hefði það átt að koma fram í fréttinni með skýrum hætti.

Skil reyndar ekki hvernig stjórnvöld ætla að tryggja að umræddum lögum verði fylgt eftir. Ætla þeir að hlera hverja einustu rafræna gátt inn í hverja einustu tölvu á landinu? Það gæti orðið erfitt. Kannski hefur Steingrímur J. Sigfússon látið frægan draum sinn um netlögregluna rætast?

Viðbót: Rafrænar bækur hafa ekki verið VSK-skyldar fyrr, það er a.m.k. nýtt.

Rafrænar vörur hækka í verði

Danskeppnin 17. júní

Þetta voru allt frábærir og hæfileikaríkir ungir dansarar í kvöld, en ég hefði viljað sjá breakdansarana ná lengra. Tók þetta myndband á 17. júní, þar sem verið var að sýna breakdans. Þarna má sjá a.m.k. tvo úr hópnum sem keppti í kvöld.

Ég styð markmið þessara asísku drengja að gera breakdansinn vinsælli. Mjög skemmtilegt dansform eins og sjá má á meðfylgjandi myndbroti.

 

 

Berglind Ýr sigurvegari

Drengileg framkoma

Manni hlýnar um hjartarætur þegar ferðaþjónustuaðilar bregðast við óhöppum eða mistökum með auðmýkt og láta auk þess ekki sitja við orðin tóm, með því að bjóðast til að bæta fjárhagslegt og umhverfislegt tjón. Ólíkt t.d. Iceland Express, sem að vísu sendi frá sér yfirlýsingar út af síendurteknum töfum á flugáætlunum þeirra, en reyndi samt að afsaka eða réttlæta atvikin og jafnvel kenna þriðja aðila um, þ.e. þeim sem þeir kaupa þjónustuna af til endursölu.

Ferðaskrifstofan er tékknesk, sem merkir að líklega er hún ekkert sérstaklega fjársterk, allavega á vestræna vísu. Gömlu austantjaldslöndin eiga flest við mikla efnahagsörðugleika að stríða og kaupgeta íbúanna ekki mikil. Það gerir viðbrögð Tékkanna enn virðingarverðari.

Biður Íslendinga afsökunar

Sýnir hvað það er mikið til af vitleysingum

Guð hlýtur að elska vitleysinga, fyrst það er til svona mikið af þeim. Man ekki hvar ég heyrði þetta orðatiltæki fyrst, en finnst það eiga vel við í þessu máli. Vil benda á að ef Hollendingurinn (f)ljúgandi er ekki að ljúga því að hann hafi átt inni á Icesave-reikning, er hann að öllum líkindum búinn að fá töpuðu innistæðurnar greiddar.

Hollensk og bresk yfirvöld ákváðu að bæta löndum sínum innistæðurnar úr tryggingarsjóðum sínum. Þess vegna lýstu þau yfir efnahagslegu stríði á hendur íslenska ríkinu og þess vegna voru ríkisstjórnir Bretlands og Hollands aðilar að Icesave málinu fyrir hönd tryggingarsjóða landanna.

Þess vegna skil ég ekki hvernig manninum datt í hug að koma með þessa mótbáru. Eina skýringin er að hann hafi verið að ljúga og/eða upphafssetning þessarar færslu á við hann.

Ef hinsvegar íslenska lögreglan hefði ákveðið að beita sömu aðferðum við að innheimta sektina og  ríkisstjórnir Bretlands og Hollands gerðu í Icesave málinu, hefði Hollendingurinn með þunga bensínfótinn þurft að þola margfalt verri meðferð. Hún hefði þá falist í einhverri af eftirfarandi leiðum, eða samblandi af þeim öllum.

1. Hótað hefði verið að gera afkomendur eða ættingja Hollendingsins gjaldþrota eða skemma fyrir þeim efnahagslega á einhvern hátt. Þannig hótanir hefur Ísland fengið frá m.a. hollenskum þingmönnum og ráðherrum, þeir hótuðu því að leggja stein í götu umsóknar Íslands að ESB. Ef mig misminnir ekki hafa þeir nefnt frekari viðskiptaþvinganir vegna Icesave.
2. Ráðist hefði verið á fyrsta Hollendinginn sem lögreglan hefði vitað að ætti pening og hann rændur eigum sínum og því lýst yfir að hann fengi þær ekki aftur fyrr en hinn Hollendingurinn gerði upp sektina. Þetta er í raun það sem breska ríkisstjórnin gerði með því að setja frysta eigur m.a. Kaupþings í skjóli hryðjuverkalaga, vegna meintrar skuldar annars banka, Landsbankans.
3. Krafist hefði verið að Hollendingurinn borgaði sektina með framtíðartekjum barnanna sinna, eða ellilífeyri ömmu hans. Holland og Bretland kröfðust þess að ríkissjóður Íslands borgaði Icesave, með peningum sem ella hefðu farið í að reka elliheimili eða fjármagna rekstur grunnskóla Íslands. Þeir sem eru nú á barnsaldri eða unglingar hefðu þá lent í að greiða Icesave með framtíðarskattgreiðslum sínum.

Maðurinn má kannski þakka fyrir hve mildilega var tekið á umferðarlagabroti hans.

Vildi ekki borga út af Icesave

Hvar eru dánartilkynningarnar núna?

Það bregst ekki þegar slæmar fréttir berast af skuldastöðu Suður-Evrópuríkjanna innan ESB, eða Írlands, að allar helstu bloggsíður gegn ESB skarta stríðsfyrirsögnum um að Evrópusambandið sé nú endanlega hrunið og ekkert eftir nema jarðarförin. Minnir mig alltaf á frægan mann sem lýsti því yfir að fréttir af andláti sínu væru stórlega ýktar, þegar ég kíki yfir upphrópanir þessara flautaþyrla (nenni sjaldnast að lesa stóryrðaflauminn í gegn.)

Ef ESB er orðið svona mikið flak að ekkert er eftir nema sópa því í ruslið og fara með á Sorpu, hvað er þá hægt að segja um Bandaríkin, fyrst þeirra gjaldmiðill fellur gagnvart þessu hræi?

Og hvað er hægt að segja um íslensku krónuna blessunina, sem er bæði með belti í nýjustu tísku frá Alþjóða gjaldeyrissjóðnum og axlabönd í stríðsáratískunni (gjaldeyrishöft) en samt síga buxurnar niður á hné? Gagnvart bæði evru og bandaríkjadal.

Nei, auðvitað eru hvorki ESB né Bandaríkin hrunin, þó vissulega sé kreppa og erfiðir tímar. Ekki einu sinni Ísland er hrunið (aftur) þó blikur séu á lofti.

Dollari veikist gagnvart evru

Ekki birta myndir af brjálæðingnum með byssu eða í einkennisbúning

Það er afskaplega hvimleitt þegar verið er að birta myndir af norska morðingjanum Breivik með hátæknivopn á lofti í herklæðum, eða í búning frímúrarareglunnar sem hann segist tilheyra. Það er eins og verið sé að gefa í skyn að hann sé einhver Rambó, sem hann er auðvitað ekki. Maðurinn er kaldrifjaður morðingi, sem ætti að minnsta kosti að loka inni til æviloka.

Við vitum að blóð selur blöð, en fjölmiðlar eiga að hætta svona myndbirtingum í virðingarskyni við aðstandendur þeirra sem glæpamaðurinn drap.

Er vörn besta sóknin?

Suður-Ameríkuliðin hafa lært varnarleik af okkur í stað þess að við myndum læra sóknarleik af þeim. Ljóst er að alltof margir suðuramerískir leikmenn eru á mála hjá félagsliðum í Evrópu.

Það lítur út fyrir að vörn sé besta sóknin, nema Diego Forlan, Sanchez og félagar taki Paragæjana í bakaríið.

Paragvæ í úrslit án þess að vinna leik

Gerir góða mynd enn áhugaverðari

Ég segi góða mynd þó ekki sé enn búið að framleiða hana, því það má nánast ganga út frá því sem vísu að mynd frá þessum leikstjóra verði góð. Ridley Scott er að sjálfsögðu þekktastur fyrir hrollvekjuna Alien, sem gaf af sér þrjár framhaldsmyndir og tvær myndir sem byggðu á ófreskjunum úr Alien myndunum, þ.e. Alien vs Predator I og II. Alien er að margra mati ein besta hryllingsmynd allra tíma.

Miklar vangaveltur hafa verið um hvernig söguþráðurinn í Promotheus verði, en upphaflega var gert ráð fyrir að myndin yrði nokkurs konar forveri (prequel) að Alien. Síðan var horfið frá þeirri hugmynd, en sagt er að Promotheus muni að einhverju leyti byggja á hugmyndum úr Alien. Við munum sennilega ekki fá að sjá ófreskjur utan úr geimnum brjótast út úr mannslíkömum, enda hefur slíku verið gerð ágætis skil í Alien myndunum fjórum. Þó er sagt að ýmislegt í myndinni verði kunnuglegt Alien-aðdáendum.

Ég bíð allavega spenntur eftir næstu afurð Ridleys Scott og enn spenntari þegar nokkuð ljóst * er að það muni bregða fyrir íslenskri náttúru í myndinni.

 

* Ég segi nokkuð ljóst því stundum kemur fyrir að atriði sem eru tekin upp vegna kvikmyndar eru klippt út úr endanlegu útgáfunni. Við skulum vona að svo verði þó ekki í þessu tilfelli.

Ridley Scott gerir mynd á Íslandi

Má lögreglan brjóta lögin?

Fór að velta því fyrir mér þegar ég skrapp á Subway á Reykjavíkurveginum í dag. Þá voru tveir lögregluþjónar að kaupa sér eitthvað í svanginn og ég tók eftir að þeir höfðu lagt lögreglubílnum fyrir utan staðinn. Eins og sjá má á meðfylgjandi mynd er gul lína á stéttinni við innganginn, sem eins og allir vita er hafa tekið bílpróf (nema einhverjir lögreglumenn?) þýðir að bannað er að stöðva ökutæki þar.

 

Ekki hægt annað en vera sáttur við strákana

Þetta var frábær árangur hjá U21 landsliðinu og meira en nóg til að bæta upp fyrir vonbrigðin gegn Hvít-Rússum og Sviss. Þeir síðarnefndu voru með betra lið og ekki hægt að ásaka okkar menn fyrir að tapa gegn þeim, en leikurinn við Hvít-Rússa fór á verri veg en gat orðið.

Að komast á Evrópumót í fyrsta sinn í íslenskri knattspyrnusögu var afrek út af fyrir sig, en að sigra Dani 3-1 á þeirra eigin heimavelli, svo til fullum af áhorfendum, er hetjudáð.

Dönum skellt